Барилгын материалын үйлдвэрлэл
МАК нь олон улсын хэмжээнд 150 гаруй нэр хүнд бүхий компанитай стратегийн түншлэл үүсгэж, дэлхийн стандарт, дэвшилтэт технологийг үйл ажиллагаандаа тасралтгүй нэвтрүүлэн ажилладаг бөгөөд Европ стандартын барилгын материалын үйлдвэрлэлийг Монгол улсад анхлан нэвтрүүлж, барилгын материалын 7 үйлдвэр байгуулан, 20 гаруй нэр төрлийн бүтээгдэхүүнийг тогтвортой үйлдвэрлэн цемент болон хөнгөн блокын борлуулалтаар зах зээлийг тэргүүлж байна.
"Сэргэлэн" аж үйлдвэрийн цогцолбор
Төв аймгийн Сэргэлэн сумын нутагт байрлах “МАК Евро Блок”, “МАК Евро Виндоор” цонх, хаалга, шилэн фасадны үйлдвэр, “МАК Евро Венти” агааржуулалтын хоолойн үйлдвэрүүдийг түшиглэн цонх, хаалганы профиль, хуванцар хоолой, уут, шуудай зэрэг хуванцар бүтээгдэхүүний үйлдвэр, бетон хийцийн үйлдвэр байгуулахаар төлөвлөж байна.
МАК Евро Блок үйлдвэр
МАК Евро Блок үйлдвэр нь ХБНГУ-ын Topwerk Группийн "HESS AAC Systems"-ийн тоног төхөөрөмжтэй, орчин үеийн компьютерийн хяналтын систем бүхий бүрэн автомат үйлдвэр бөгөөд Европ стандарт, арга туршлагын дагуу бүтээгдэхүүн үйлдвэрлэж байна. Тус үйлдвэрийн эдийн засагт оруулж буй хувь нэмрийг тодотгон Үндэсний бүтээн байгуулалтын дээд шагнал - "Төрийн Гэрэгэ" шагналыг олгосон билээ.
МАК Евро Виндоор үйлдвэр
Төв аймгийн Сэргэлэн суманд байрлах МАК Евро Виндоор үйлдвэр нь Европын SCHÜCO, WEINIG, ELUMATEC, LISEC, FRATELLI PEZZA зэрэг дэлхийд танигдсан брэндийн бүрэн болон хагас автомат тоног төхөөрөмж, технологийг нэвтрүүлж, 2019 оноос хойш үйл ажиллагаа явуулж байна. Бид олон улсын стандартад нийцсэн хөнгөн цагаан, хуванцар (PVC), модон хаалга, цонх болон фасад, шилэн багцыг чанарын өндөр түвшинд үйлдвэрлэн зах зээлд нийлүүлж байна.
МАК Евро Венти үйлдвэр
Улаанбаатар хотоос 50 км зайд Төв аймгийн Сэргэлэн сумын нутагт байрлах “МАК Евро Венти” үйлдвэр нь 2022 онд ашиглалтад орсон бөгөөд Швейцар Улсын дэлхийд тэргүүлэгч “SPIRO INTERNATIONAL”, ХБНГУ-ын “SCHRODER GROUP” компанийн хагас болон бүрэн автомат тоног төхөөрөмжтэй бөгөөд эдгээр компаниудын арга туршлага, чанар, стандартыг Монгол улсад нутагшуулан өндөр чанарын ган агаар сэлгэлтийн хоолой үйлдвэрлэн зах зээлд нийлүүлж байна.
"Даланжаргалан" аж үйлдвэрийн цогцолбор
Дорноговь аймгийн Даланжаргалан сумын нутагт байрлах “МАК Евро Цемент” үйлдвэрийг түшиглэн файбер цементэн хавтан, гантиг болон инженерчилсэн чулуун хавтангийн үйлдвэр шинээр барьж, “Даланжаргалан” аж үйлдвэрийн цогцолборыг байгуулна. Ажиллах хүчнийг Дорноговь болон Говьсүмбэр аймгаас бүрдүүлэн, инженер техникийн ажилтнуудыг мэргэшүүлэн сургаж, орон сууц, цэцэрлэг, сургууль бүхий суурьшлын бүс байгуулахаар төлөвлөж байна.
МАК Евро Цемент, Шохойн үйлдвэр
"МАК Евро цемент" үйлдвэр нь 2017 онд ашиглалтад орсон бөгөөд дэлхийд тэргүүлэгч Европ компаниудын шилдэг арга туршлага, техник технологийг ашиглан эх орны эрдэс, түүхий эдээр баялаг бүтээж буй Монголын анхны робот лабораторитой, бүрэн автомат, байгаль орчинд ээлтэй, хуурай аргын цементийн үйлдвэр юм.
