МАК КОМПАНИ ШУТИС-ИЙН ГУУС-ИЙН МАРКШЕЙДЕРИЙН СУРГАЛТ, СУДАЛГААНЫ ЛАБОРАТОРИЙГ ИЖ БҮРЭН ТОХИЖУУЛЖ ӨГЛӨӨ

 “Монголын Алт” (МАК) ХХК боловсрол, эрүүл мэндийн салбарын хөгжлийг дэмжих нийгмийн хариуцлагын бодлогынхоо хүрээнд ШУТИС-ийн Маркшейдерийн сургалт, судалгааны лаборатори болон багш нарын танхимыг иж бүрэн тохижуулж, өнөөдөр албан ёсоор нээлээ. Мөн энэ үеэр ШУТИС-ийн зүгээс Маркшейдерийн сургалт, судалгааны лабораторийг МАК компанийн үүсгэн байгуулагч, Бодлогын зөвлөлийн дарга Бямбаагийн Нямтайширын нэрэмжит болгож байгаагаа зарласан юм. 

МАК компани Монгол Улсын эдийн засгийн тулгуур болсон уул уурхайн салбарын ирээдүйн хөгжилд бодит хувь нэмэр оруулах үүднээс энэхүү танхимыг 457 сая төгрөгийн хөрөнгө оруулалтаар тохижуулаа. Тодруулбал, танхимыг бүрэн засварлаж 33 суурин компьютер, маркшейдер-инженерийн мэргэжлийн тоног төхөөрөмжийн хамтаар хүлээлгэн өгч байна. Үүгээр зогсохгүй цаашид сургуулийн корридорыг засварлахаар төлөвлөж байна. Танхимыг засахдаа МАК компанийн үйлдвэрлэж буй европ стандартын барилгын материалуудыг ашигласан юм. Тухайлбал, хаалга, цонхыг нь МАК Евро Виндоор үйлдвэр нийлүүллээ.

Шинээр тохижуулсан Маркшейдерийн сургалт судалгааны лабораториор ШУТИС-ийн Геологи, уул уурхайн сургуулийн 1000 гаруй оюутан өдөр тутамдаа үйлчлүүлж таатай орчинд онол, практикт суралцах боломжоор хангагдаж байгаа юм. Түүнчлэн МАК компани нь уул уурхайн салбарын ирээдүйн ажиллах хүчинг бэлтгэх чиглэлд анхааран техник, технологийн мэргэжилтэн бэлтгэж буй 3 их сурууль болон орон нутгийн 6 политехникийн коллежтэй хамтын ажиллагааны санамж бичиг байгуулж, тогтвортой хамтран ажиллаж байгаа юм. Мөн улс орны хөгжлийн нэн тэргүүний салбар болох эрчим хүчний салбарын залуу боловсон хүчинг бэлтгэх, ур чадварыг хөгжүүлэх бодлогын хүрээнд ШУТИС-ийн Эрчим хүчний инженерийн сургуулийн 100 оюутанд сургалтын тэтгэлэг олгохоор шийдвэрлэсэн бөгөөд энэхүү хөтөлбөрт нийт 2 тэрбум гаруй төгрөг зарцуулахаар төлөвлөж байна. Мөн оюутнуудыг урт хугацаанд цалинтай дадлагажуулах, үргэлжлүүлэн тогтвортой ажлын байраар хангах зэргээр дэмжин ажиллаж байна .

МАК компани өнгөрсөн хугацаанд нийгийн хариуцлагын 100 гаруй төсөл, хөтөлбөр хэрэгжүүлжээ.  Үүнээс зөвхөн боловсролын салбарт гэхэд л 30 гаруй тэрбум төгрөгийн хөрөнгө оруулалт хийсэн байна. Ирээдүй хойчийнхоо суралцах орчин нөхцөлийг сайжруулах үүднээс Өмнөговь аймгийн Гурвантэс суманд сургууль, дотуур байр, Дорноговь аймгийн Даланжаргалан суманд хүүхдийн цэцэрлэг, Сэлэнгэ аймгийн Ерөө суманд олон улсын стандарт бүхий 960 хүүхдийн багтаамжтай сургууль байгуулсан нь Монгол Улсын жишиг бүтээн байгуулалтын нэг болсон билээ.