"Ботгонд бонус" хөтөлбөрийн хүрээнд 2022 онд 80.2 сая төгрөгийн урамшуулал олголоо

“Монголын Алт” (МАК) ХХК нь нийгмийн хариуцлагын хүрээнд 2013 оноос хойш Өмнөговь, Дорноговь, Дундговь аймгуудад “Ботгонд бонус” хөтөлбөрийг хэрэгжүүлж байна. Тус хөтөлбөрийн зорилго нь дэлхийд ховордсон хоёр бөхт Монгол тэмээний үүлдэр угсааг сайжруулах, тоо толгойг өсгөх, улмаар говийн экологийн тэнцвэрт байдлыг хадгалахад хувь нэмрээ оруулж, малчдын хөдөлмөрийг үнэлэх явдал юм.

“Ботгонд бонус” хөтөлбөрийн хүрээнд бойжсон ботго тус бүрд 20 мянган төгрөгийн урамшуулал олгож, малчдыг дэмждэг билээ. Энэ жил 4010 ботго бойжуулсан 3 аймгийн 5 сумын малчдад нийт 80.2 сая төгрөгийн урамшуулал олгосон юм. Үүнд:

- Дорноговь аймгийн Мандах сум - 39.1 сая төгрөг

- Дорноговь аймгийн Даланжаргалан сум - 3.1 сая төгрөг

- Өмнөговь аймгийн Гурвантэс сум - 19.6 сая төгрөг

- Дундговь аймгийн Дэлгэрхангай сум - 17.5 сая төгрөг

- Дундговь аймгийн Баянжаргалан сум - 660 мянган төгрөг

Хөтөлбөр анх хэрэгжиж эхлэх үед:

- Дорноговь аймгийн Мандах сум 3,000 гаруй тоо толгой тэмээ тоолуулж байсан бол 2022 онд нийт 1958 ботго бойжуулснаар 10,195 тоо толгой тэмээн сүрэгтэй болж, 1970-аад оноос хойш анх удаа "Түмэн тэмээний баяр" зохион байгуулсан юм. Харин Өмнөговь аймгийн Гурвантэс суманд анх 450 ботго бойжиж байсан бол 2022 оны байдлаар энэ тоо хоёр дахин нэмэгдэж 984 болж өсжээ.

“Ботгонд-Бонус” хөтөлбөр хэрэгжсэнээр тэмээн сүргийн тоо толгой тасралтгүй өссөн үзүүлэлтэй байгаа нь хөтөлбөрийн зорилго биеллээ олж буйн илрэл юм. Монгол улсын хэмжээнд 2022 оны мал тооллогын дүнгээр 470.4 мянган тэмээ тоологдсон нь өнгөрсөн оны мөн үетэй харьцуулахад даруй 16.6 мянган тоо толгойгоор өссөн дүн болжээ.

“Монголын Алт” (МАК) ХХК 11 оюутанд ₮38.9 саяын сургалтын тэтгэлэг олголоо

“Монголын Алт” (МАК) ХХК орон нутгийн хүүхдүүдийн сурч боловсрох боломжийг нэмэгдүүлж, чанартай боловсролыг дэмжих хүрээнд 2016 оноос хойш сургалтын тэтгэлэгт хөтөлбөр зарлаж байна. Харин 2023 оны хичээлийн жилд Өмнөговь аймгийн Гурвантэс сумын 5, Дорноговь аймгийн Даланжаргалан сумын 2, Дундговь аймгийн Баянжаргалан, Дэлгэрхангай сумын тус бүр 2, нийт 11 оюутанд 38.9 сая төгрөгийн сургалтын тэтгэлэг олголоо.

Сурч хөгжих хүсэл эрмэлзэл, сурлагын дүнгээр шалгарсан эдгээр оюутнууд нь бүтэн жилийн сургалтын төлбөрөө хүлээж авч байна. Мөн компаниас зохион байгуулдаг дотоод сургалтын хөтөлбөр хамрагдах, үйлдвэрлэлийн дадлага хийх боломж олгохоор болсон байна. Түүнчлэн амжилттай суралцаж төгссөн тохиолдолд тогтвортой ажлын байраар хангах юм.

МУБИС-ийн 4-р курсийн оюутан Д.Чимэгбаяр

Үндэсний техникийн их сургуулийн 2-р курсийн оюутан Б.Баяр

МУИС-ийн 1-р курсийн оюутан Б.Дашзэгвэ

"Монголын Алт" МАК ХХК-ийн Худалдаа хариуцсан Дэд ерөнхийлөгч Д.Далайбаяр

"Монголын Алт" МАК ХХК-ийн Сургалтын мэргэжилтэн Б.Лувсангомбо

Зах зээлд шинээр хөл тавьж буй залуучуудын хөдөлмөр эрхлэлтийг харвал, их, дээд сургууль төгссөн 30 оюутан тутмын ердөө 1 нь, Мэргэжил сургалт үйлдвэрлэлийн төвийг төгссөн 6 оюутан тутмын 1 нь мэргэжлээрээ ажиллаж байна. Мөн Монгол улсын хэмжээнд инженер, хими, физик гэсэн шинжлэх ухааны чиглэлээр суралцагчдын тоо жил ирэх тусам буурч байгаа гэсэн судалгаа байна. Түүнчлэн компаниудаас олгогддог тэтгэлэгт хөтөлбөрүүдэд орон нутгийн оюутнууд хамрагдах боломж бага байдаг байна. Тиймээс МАК компани энэ чиглэлд анхаарч үйлдвэрлэлийн салбарыг хөгжүүлэх мэргэжлүүд болон орон нутгийн хөдөлмөр эрхлэлтэд бодитой хувь нэмэр оруулах зорилгоор сүүлийн 7 жил тэтгэлэгт хөтөлбөр зарлаж оюутан, залуусыг дэмжиж байгаа юм.

МАК Евроблок, МАК Цемент ХХК-ийн олон улсын менежментийн тогтолцооны стандартуудыг баталгаажууллаа

Барилгын материалын импортын хараат байдлыг халж, үндэсний үйлдвэрлэлийг хөгжүүлж буй “Монголын Алт” (МАК) ХХК-ийн цемент болон блокын үйлдвэр олон улсын менежментийн тогтолцооны стандартуудыг хэрэгжүүлж байгааг баталгаажууллаа.

"Монголын Алт" ХХК-ийн Евроблок үйлдвэрийн үйл ажиллагаанд ISO 9001:2015 Чанарын менежментийн тогтолцоо, ISO 14001:2015 Байгаль орчны менежментийн тогтолцоо, ISO 45001:2018 Хөдөлмөрийн эрүүл мэнд аюулгүй байдлын менежментийн тогтолцоо олон улсын стандартын аудитдаа амжилттай хамрагдан баталгаажуулалтын гэрчилгээгээ гардан авлаа. Мөн энэ өдөр “МАК Цемент ХХК” ISO 45001:2018 Хөдөлмөрийн аюулгүй байдал, эрүүл ахуйн менежментийн стандартын нэгдсэн аудитыг амжилттай давсныг менежментийн тогтолцооны баталгаажуулалтын “Монсертф ХХК” батламжилсан юм.

Монсертф ХХК-ийн Ерөнхий захирал Г.Билгүүн

“Монголын Алт” (МАК) ХХК-ийн Евро блок үйлдвэрийн дарга Д.Бадамдамдин

Ийнхүү импортыг орлон, гадагш урсах валютын урсгалыг зогсооход хувь нэмрээ оруулж буй “Монголын Алт” МАК ХХК-ийн евро стандартын цемент, блокын үйлдвэрүүд олон улсын менежментийн тогтолцооны стандартуудыг нэвтрүүлснээр олон улсын сайн туршлагуудаас хэрэгжүүлж, давуу талаа сайжруулан үйл ажиллагаагаа нэг шат ахиулах нөхцөлийг бүрдүүллээ. Энэхүү гэрчилгээ нь Монсертф ХХК-ийн 301, 302 дахь байгууллагын баталгаажуулалт бөгөөд “Олон улсын итгэмжлэлийн форум”-ын гишүүнчлэл бүхий 162 улсад харилцан хүлээн зөвшөөрөх гэрээний нөхцөлийг бүрэн хангах юм байна.

Монсертф ХХК-ийн Тэргүүлэх аудитор Б.Энхтөгс