Дорноговь аймгийн Даланжаргалан суманд нэгдсэн инженерийн шугам сүлжээнд холбогдсон, хяналтын камер, хамгийн сүүлийн үеийн домофон систем суурилуулсан тус бүр 40 м.кв 2 өрөө бүхий 8 айлын орон сууцыг барьж, ашиглалтад оруулаад байна. Төрийн албан хаагчдын нийгмийн асуудлыг шийдэхэд чиглэсэн энэхүү орон сууцны бүтээн байгуулалтад ашигласан блок, цемент, цонх, хаалга зэрэг барилгын материалуудыг “Монголын Алт” (МАК) компанийн Евро стандартын үйлдвэрүүдээс бүрэн хангаж, нийт 1 тэрбум төгрөгийн хөрөнгөөр санхүүжүүлжээ.

“Монголын Алт” (МАК) ХХК нь олборлолт болон үйлдвэрлэл явуулж байгаа газар орон нутаг бүртээ байгаль орчны нөлөөллийн асуудлыг нэн тэргүүнд тавин Хариуцлагатай уул уурхайг хөгжүүлэхэд салбартаа үлгэр дуурайл үзүүлж ирсэн. Өнгөрсөн хугацаанд нийт ашигласан талбайд техник болон биологийн нөхөн сэргээлт хийж тухайн орон нутгийн удирдлагад хүлээлгэн өгсөн байна. Мөн өөрийн уул, уурхай, барилгын материалын үйлдвэрүүдийн дэргэд 150 гаруй мянган мод, модлог ургамал тарьж, ургуулан ногоон байгууламжуудыг байгуулжээ.

Уул уурхайн төслийн төлөвлөлтөөс хайгуул, олборлолт, боловсруулалт, үйлдвэрлэл, хаалт хүртэлх үйл ажиллагааныхаа бүх үе шатанд байгаль орчинд үүсэж болох аливаа сөрөг нөлөөллөөс урдчилан сэргийлж, сөрөг нөлөөллийг бууруулахад ихэд анхаарч ажиллаж ирлээ. Тиймдээ ч ногоон байгууламж, нөхөн сэргээлтийн ажлыг үйл ажиллагаа явуулж эхэлсэн цагаасаа зэрэгцүүлж гүйцэтгэж ирсэн. Өнгөрсөн 20 гаруй жилийн хугацаанд МАК-ийн харьяанд байх уурхайн нөхөн сэргээлт ба үйлдвэр уурхайн орчны тохижилтын ногоон байгууламжинд 130 гаруй мянган мод, бут тарьсан нь өдгөө 85 хувийн ургалттай ногоон төглүүд болсон байна. МАК-ийн уул уурхайн нөхөн сэргээлтийн хамгийн сайн жишээ бол Дорноговь аймгийн Даланжаргалан сумын нутаг дахь Элдэвийн нүүрсний уурхай юм. Өнгөрсөн хугацаанд тус уурхайн нийт хөндөгдсөн талбайн 98 хувь буюу 147.6 га-д техникийн нөхөн сэргээлт хийсэн бол 70 хувь буюу 105.56 га талбайд биологийн нөхөн сэргээлтийг тухайн бүс нутагтаа төдийгүй Монгол улсдаа үлгэр, жишээ болохуйц хийж гүйцэтгэсэн нь МАК-чуудын хувьд байгаль орчныг хамгаалах үйлсэд нэн хариуцлагатай ханддагийн тод үлгэр жишээ болсон юм. 2022 онд “Тэрбум мод” үндэсний санаачилгад нэгдэн нийт 20 төрлийн 11 мянган мод, бут тариад байна.

Эрүүл Монгол хүн, эрүүл нийгмийг цогцлоохын тулд спортын арга хэмжээг дэмжин ажиллаж байна. Тухайлбал, Монголын анхны өвлийн спортын битүү дээвэртэй “Steppe Arena” цэнгэлдэх хүрээлэнгийн бүтээн байгуулалтад “МАК Euro block”, “МАК Euro Cement”, “МАК Euro Windoor” үйлдвэрийн бүтээгдэхүүнүүдээ нийлүүлэн хамтран ажилласан.

Кёрлингийн спортыг Монгол улсад хөгжүүлэх чиглэлд Монголын Кёрлингийн холбоотой хамтран ажиллаж байгаа бөгөөд 8-р сард Норвеги улсын Лиллехаммер хотод зохион байгуулагдсан Өсвөрийн тамирчдын бэлтгэлийн хөтөлбөр, 12-р сард Финландын Лёха хотод зохион байгуулагдсан өсвөрийн B ангиллын ДАШТ-д оролцсон Монголын баг тамирчдад дэмжлэг үзүүлээд байна.